Wär oder was isch ds WUNDERFROUELI?
Mi Name isch Karin. Gebore bini in Züri - u stolz druf. 😉 Mini erschte 4 Jahr hani ds Dübedorf ime Block gläbt. När si mer uf Reutige züglet u dert bini hütt o ume dehei - mit Blick ufe Niese - mi Chraft-Bärg. I wohne i mim Eltere-Huus im 1. Stock. Im Parterre isch mis B&B Schweden-Kafi.ch dehei.
Zu mir ghöre miner Schlittehünd Nikita, Mayuk u Baikal.
Mi brueflech Wärdegang hett mit em KV gstartet, hett e Abstächer i ds Web-Design gmacht u när über 22 Jahr als Lehrerin (u Klasselehrerin) ar Bärntorschueu ds Thun e Fortsetzig gfunge. Ir Zwüschezyt hani mi eigeti GmbH gründet u schaffe no es paar Stund pro Wuche als Mittagsbetreuerin ar HPS Stäffisburg.
Wyterbildig isch mer immer wichtig gsy u i ha gwüss e Hampfele Papier, woni hie chönnt ufelade. Aber i bi nid mini Papier - oder so. Was mi uszeichnet, isch mini Schnälligkeit, mis Gspüri, was ds Gägeüber bruucht, Intuition, Empathie u es guets Buuchgfüeu. U was zu mir ghört so wie die blutte Füess: Mini Mundart. Ds Bärndütsch, woni mi am beschte dermit cha usdrücke.
Nöii Idee u Visione chöme wie Sand am Meer u i förchte fasch, dasi meh als 88i sött wärde, dasi de aues eis cha mache, wo no so uf mire "Bucket-List" steit. Wieso 88i? Wüui das jetz no es cools Alter finde, für ume e anderi Form aadsnäh. Aber jetz gahni eis die nägschte 11 Jahr aa. Wüu, nachem Udo Jürgens faht ja de denn ersch mis Läbe so richtig a. *smile*
Säg mer, was du suechsch, u i hilfe der derby, es ds finge. Wasi scho so "iisi-piisi" für miner ChundInne gfunde ha:
Wohnig | Job | KollegInne | Fahrgmeinschaft | Hundeschuel | Wyterbildigs-Müglechkeit | Fähler i Word-Dokumänt | etc.
